پیغمبر نے ( جواب میں ) کہا کہ : آسمان اور زمین میں جو کچھ کہا جاتا ہے ، میرا پروردگار اس سب کو جانتا ہے ۔ وہ ہر بات سنتا ہے ، ہر چیز سے باخبر ہے ۔ ( ١ )
۔ ( نبئ معظّم صلی اللہ علیہ وآلہ وسلم نے ) فرمایا کہ میرا رب آسمان اور زمین میں کہی جانے والی ( ہر ) بات کو جانتا ہے اور وہ خوب سننے والا خوب جاننے والا ہے
سورة الْاَنْبِیَآء حاشیہ نمبر :6
یعنی رسول نے کبھی اس جھوٹے پروپیگنڈے اور سرگوشیوں کی اس مہم ( Whispering Campaign ) کا جواب اس کے سوا نہ دیا کہ تم لوگ جو کچھ باتیں بناتے ہو سب خدا سنتا اور جانتا ہے ، خواہ زور سے کہو ، خواہ چپکے چپکے کانوں میں پھونکو ۔ وہ کبھی بے انصاف دشمنوں کے مقابلے میں ترکی بہ ترکی جواب دینے پر نہ اتر آیا ۔
