یہ لوگ بڑے صبر کرنے والے ہیں ، سچائی کے خوگر ہیں ، عبادت گذار ہیں ( اللہ کی خوشنودی کے لیے ) خرچ کرنے والے ہیں ، اور سحری کے اوقات میں استغفار کرتے رہتے ہیں ۔
۔ ( یہ لوگ ) صبر کرنے والے ہیں اور قول و عمل میں سچائی والے ہیں اور ادب و اطاعت میں جھکنے والے ہیں اور اﷲ کی راہ میں خرچ کرنے والے ہیں اور رات کے پچھلے پہر ( اٹھ کر ) اﷲ سے معافی مانگنے والے ہیں
سورة اٰلِ عِمْرٰن حاشیہ نمبر :13
یعنی راہ حق پر پوری استقامت دکھانے والے ہیں ۔ کسی نقصان یا مصیبت سے ہمت نہیں ہارتے ، کسی ناکامی سے دل شکستہ نہیں ہوتے ، کسی لالچ سے پھسل نہیں جاتے اور ایسی حالت میں بھی حق کا دامن مضبوطی کے ساتھ تھامے رہتے ہیں ، جبکہ بظاہر اس کی کامیابی کا کوئی امکان نظر نہ آتا ہو ۔ ( ملاحظہ ہو سورہ بقرہ ، حاشیہ نمبر ٦۰ ) ۔
