یقین رکھو کہ قیامات کی گھڑی ضرور آنے والی ہے ، جس میں کسی شک کی گنجائش نہیں ہے ، لیکن اکثر لوگ ایمان نہیں لاتے ۔

بیشک قیامت ضرور آنے والی ہے اس میں کچھ شک نہیں لیکن بہت لوگ ایمان نہیں لاتے ( ف۱۲٦ )

اس کے آنے میں کوئی شک نہیں ، مگر اکثر لوگ نہیں مانتے 81 ۔

بے شک قیامت ضرور آنے والی ہے ، اس میں کوئی شک نہیں ۔ لیکن اکثر لوگ یقین نہیں رکھتے

سورة الْمُؤْمِن حاشیہ نمبر :81 یہ وقوع آخرت کا قطعی حکم ہے جو استدلال کی بنیاد پر نہیں بلکہ صرف علم ہی کی بنا پر لگایا جا سکتا ہے ، اور کلام وحی کے سوا کسی دوسرے کلام میں یہ بات اس قطعیت کے ساتھ بیان نہیں ہو سکتی ۔ وحی کے بغیر محض عقلی استدلال سے جو کچھ کہا جا سکتا ہے وہ بس اسی قدر ہے کہ آخرت ہو سکتی ہے ، اور اس کو ہونا چاہیے ۔ اس سے آگے بڑھ کر یہ کہنا کہ آخرت یقیناً ہو گی اور ہو کر رہے گی ، یہ صرف اس ہستی کے کہنے کی بات ہے جسے معلوم ہے کہ آخرت ہو گی ، اور وہ ہستی اللہ تعالیٰ کے سوا کوئی نہیں ہے ۔ یہی وہ مقام ہے جہاں پہنچ کر یہ بات واضح ہو جاتی ہے کہ قیاس و استدلال کے بجائے خالص علم پر دین کی بنیاد اگر قائم ہو سکتی ہے تو وہ صرف وحی الہیٰ کے ذریعہ ہی سے ہو سکتی ہے ۔