اور اسے ایسی جگہ سے رزق عطا کرے گا جہاں سے اسے گمان بھی نہیں ہوگا ۔ اور جو کوئی اللہ پر بھروسہ کرے ، تو اللہ اس ( کا کام بنانے ) کے لیے کافی ہے ۔ یقین رکھو کہ اللہ اپنا کام پورا کر کے رہتا ہے ۔ ( البتہ ) اللہ نے ہر چیز کا ایک اندازہ مقرر کر رکھا ہے ۔ ( ٧ )

اور اسے وہاں سے روزی دے گا جہاں اس کا گمان نہ ہو ، اور جو اللہ پر بھروسہ کرے تو وہ اسے کافی ہے ( ف۱۳ ) بیشک اللہ اپنا کام پورا کرنے والا ہے ، بیشک اللہ نے ہر چیز کا ایک اندازہ رکھا ہے ،

اور اسے ایسے راستے سے رزق دے گا جدھر اس کا گمان بھی نہ جاتا ہو10 ۔ جو اللہ پر بھروسہ کرے اس کے لیئے وہ کافی ہے ۔ اللہ اپنا کام پورا کر کے رہتا ہے 11 ۔ اللہ نے ہر چیز کے لیئے ایک تقدیر مقرر کر رکھی ہے ۔

اور اسے ایسی جگہ سے رِزق عطا فرماتا ہے جہاں سے اس کا گمان بھی نہیں ہوتا ، اور جو شخص اللہ پر توکل کرتا ہے تو وہ ( اللہ ) اسے کافی ہے ، بیشک اللہ اپنا کام پورا کرلینے والا ہے ، بیشک اللہ نے ہر شے کے لئے اندازہ مقرر فرما رکھا ہے

سورة الطَّلَاق حاشیہ نمبر :10 مراد یہ ہے کہ عدت کے دوران میں مطلقہ بیوی کو گھر میں رکھنا ، اس کا خرچ برداشت کرنا ، اور رخصت کرتے ہوئے اس کو مہر یا متعہ طلاق دے کر رخصت کرنا بلا شبہ آدمی پر مالی بار ڈالتا ہے ۔ جس عورت سے آدمی دل برداشتہ ہو کر تعلقات منقطع کر لینے پر آمادہ ہو چکا ہو ، اس پر مال خرچ کرنا تو اسے ضرور ناگوار ہو گا ۔ اور اگر آدمی تنگ دست بھی ہو تو یہ خرچ اسے اور زیادہ کَھلے گا ۔ لیکن اللہ سے ڈرنے والے آدمی کو یہ سب کچھ برداشت کرنا چاہیے ۔ تمہارا دل تنگ ہو تو ہو ، اللہ کا ہاتھ رزق دینے کے لیے تنگ نہیں ہے ۔ اس کی ہدایت پر چل کر مال خرچ کرو گے تو وہ ایسے راستوں سے تمہیں رزق دے گا جدھر سے رزق ملنے کا تم گمان بھی نہیں کرسکتے ۔ سورة الطَّلَاق حاشیہ نمبر :11 یعنی کوئی طاقت اللہ کے حکم کو نافذ ہونے سے روکنے والی نہیں ہے ۔