یہودیوں میں سے کچھ وہ ہیں جو ( تورات ) کے الفاظ کو ان کے موقع محل سے ہٹا ڈالتے ہیں ، اور اپنی زبانوں کو توڑ مروڑ کر اور دین میں طعنہ زنی کرتے ہوئے کہتے ہیں : سمعنا وعصینا ۔ اور اسمع غیر مسمع ۔ اور راعنا ۔ حالانکہ اگر وہ یہ کہتے کہ : سمعنا واطعنا اور اسمع وانظرنا ۔ تو ان کے لیے بہتر اور راست بازی کا راستہ ہوتا ( ٣٣ ) لیکن ان کے کفر کی وجہ سے اللہ نے ان پر پھٹکار ڈال رکھی ہے ، اس لیے تھوڑے سے لوگوں کے سوا وہ ایمان نہیں لاتے ۔

کچھ یہودی کلاموں کو ان کی جگہ سے پھیرتے ہیں ( ف۱۳۹ ) اور ( ف۱٤۰ ) کہتے ہیں ہم نے سنا اور نہ مانا اور ( ف۱٤۱ ) سنیئے آپ سنائے نہ جائیں ( ف۱٤۲ ) اور راعنا کہتے ہیں ( ف۱٤۳ ) زبانیں پھیر کر ( ف۱٤٤ ) اور دین میں طعنہ کے لئے ( ف۱٤۵ ) اور اگر وہ ( ف۱٤٦ ) کہتے کہ ہم نے سنا اور مانا اور حضور ہماری بات سنیں اور حضور ہم پر نظر فرمائیں تو ان کے لئے بھلائی اور راستی میں زیادہ ہوتا لیکن ان پر تو اللہ نے لعنت کی ان کے کفر کے سبب تو یقین نہیں رکھتے مگر تھوڑا ( ف۱٤۷ )

جو لوگ یہودی بن گئے ہیں 72 ان میں کچھ لوگ ہیں جو الفاظ کو ان کے محل سے پھیر دیتے ہیں ، 73 اور دین حق کے خلاف نیش زنی کرنے کے لیے اپنی زبانوں کو توڑ موڑ کر کہتے ہیں سَمِعْنَا وَ عَصَیْنَا 74 اور اِسمَعْ غَیْرَ مسْمَعٍ 75 اور رَاعِنَا 76 ۔ حالانکہ اگر وہ کہتے سَمِعْنَا وَ اَطَعْنَا ، اور اِسمَعْ اور انْظرْنَا تو یہ انہی کے لیے بہتر تھا اور زیادہ راستبازی کا طریقہ تھا ۔ مگر ان پر تو ان کی باطل پرستی کی بدولت اللہ کی پِھٹکار پڑی ہوئی ہے اس لیے وہ کم ہی ایمان لاتے ہیں ۔

اور کچھ یہودی ( تورات کے ) کلمات کو اپنے ( اصل ) مقامات سے پھیر دیتے ہیں اور کہتے ہیں: ہم نے سن لیا اور نہیں مانا ، اور ( یہ بھی کہتے ہیں: ) سنیئے! ( معاذ اللہ! ) آپ سنوائے نہ جائیں ، اور اپنی زبانیں مروڑ کر دین میں طعنہ زنی کرتے ہوئے”رَاعِنَا“ کہتے ہیں ، اور اگر وہ لوگ ( اس کی جگہ ) یہ کہتے کہ ہم نے سنا اور ہم نے اطاعت کی اور ( حضور! ہماری گزارش ) سنئے اور ہماری طرف نظرِ ( کرم ) فرمائیے تو یہ اُن کے لئے بہتر ہوتا اور ( یہ قول بھی ) درست اور مناسب ہوتا ، لیکن اللہ نے ان کے کفر کے باعث ان پر لعنت کی سو تھوڑے لوگوں کے سوا وہ ایمان نہیں لاتے

سورة النِّسَآء حاشیہ نمبر :72 یہ نہیں فرمایا کہ ”یہودی ہیں“ بلکہ یہ فرمایا کہ ”یہودی بن گئے ہیں“ ۔ کیونکہ ابتداءً تو وہ بھی مسلمان ہی تھے ، جس طرح ہر نبی کی امت اصل میں مسلمان ہوتی ہے ، مگر بعد میں وہ صرف یہودی بن کر رہ گئے ۔ سورة النِّسَآء حاشیہ نمبر :73 اس کے تین مطلب ہیں: ایک یہ کہ کتاب اللہ کے الفاظ میں رد و بدل کرتے ہیں ۔ دوسرے یہ کہ اپنی تاویلات سے آیات کتاب کے معنی کچھ سے کچھ بنا دیتے ہیں ۔ تیسرے یہ کہ یہ لوگ محمد صلی اللہ علیہ وسلم اور آپ صلی اللہ علیہ وسلم کے پیرووں کی صحبت میں آکر ان کی باتیں سنتے ہیں اور واپس جا کر لوگوں کے سامنے غلط طریقہ سے روایت کرتے ہیں ۔ بات کچھ کہی جاتی ہے اور وہ اسے اپنی شرارت سے کچھ کا کچھ بنا کر لوگوں میں مشہور کرتے ہیں تاکہ انہیں بدنام کیا جائے اور ان کے متعلق غلط فہمیاں پھیلا کر لوگوں کو اسلامی جماعت کی طرف آنے سے روکا جائے ۔ سورة النِّسَآء حاشیہ نمبر :74 یعنی جب انہیں خدا کے احکام سنائے جاتے ہیں تو زور سے کہتے ہیں کہ سَمِعْنَا ( ہم نے سن لیا ) اور آہستہ کہتے ہیں عَصَیْنَا ( ہم نے قبول نہیں کیا ) ۔ یا اَطَعْنَا ( ہم نے قبول کیا ) کا تلفظ اس انداز سے زبان کو لچکا دے کر کرتے ہیں کہ عَصَیْنَا بن جاتا ہے ۔ سورة النِّسَآء حاشیہ نمبر :75 یعنی دوران گفتگو میں جب وہ کوئی بات محمد صلی اللہ علیہ وسلم سے کہنا چاہتے ہیں تو کہتے ہیں اِسْمَعْ ( سنیے ) اور پھر ساتھ ہی غَیْرَ مُسْمَعٍ بھی کہتے ہیں جو ذو معنی ہے ۔ اس کا ایک مطلب یہ ہے کہ آپ ایسے محترم ہیں کہ آپ کو کوئی بات خلاف مرضی نہیں سنائی جاسکتی ۔ دوسرا مطلب یہ ہے کہ تم اس قابل نہیں ہو کہ تمہیں کوئی سنائے ۔ ایک اور مطلب یہ ہے کہ خدا کرے تم بہرے ہو جاؤ ۔ سورة النِّسَآء حاشیہ نمبر :76 اس کی تشریح کے لیے ملاحظہ ہو سورہ بقرہ حاشیہ نمبر ۱۰۸ ۔