اور آسمانوں اور زمین میں جو لوگ بھی ہیں ، اللہ کے ہیں ۔ اور جو ( فرشتے ) اللہ کے پاس ہیں ، وہ نہ اس کی عبادت سے سرکشی کرتے ہیں ، نہ تھکتے ہیں ۔

اور اسی کے ہیں جتنے آسمانوں اور زمین میں ہیں ( ف۳۵ ) اور اس کے پاس والے ( ف۳٦ ) اس کی عبادت سے تکبر نہیں کرتے اور نہ تھکیں ،

زمین اور آسمانوں میں جو مخلوق بھی ہے اللہ کی ہے ۔ 18 اور جو ﴿فرشتے﴾ اس کے پاس ہیں 19 وہ نہ اپنے آپ کو بڑا سمجھ کر اس کی بندگی سے سرتابی کرتے ہیں اور نہ ملول ہوتے ہیں ۔ 20

اور جو کوئی آسمانوں اور زمین میں ہے اسی کا ( بندہ و مملوک ) ہے ، اور جو ( فرشتے ) اس کی قربت میں ( رہتے ) ہیں وہ نہ تو اس کی عبادت سے تکبّر کرتے ہیں اور نہ وہ ( اس کی طاعت بجا لاتے ہوئے ) تھکتے ہیں

سورة الْاَنْبِیَآء حاشیہ نمبر :18 یہاں سے توحید کے اثبات اور شرک کے ابطال پر گفتگو شروع ہوتی ہے جو نبی صلی اللہ علیہ وسلم اور مشرکین مکہ کے درمیان اصل بنائے نزاع تھی ۔ اب مشرکین کو یہ بتایا جا رہا ہے کہ کائنات کا یہ نظام جس میں تم جی رہے ہو ( جس کے متعلق ابھی یہ بتایا جا چکا ہے کہ یہ کسی کھلندڑے کا کھلونا نہیں ہے ، جس کے متعلق یہ بھی بتایا جا چکا ہے کہ یہ ایک سنجیدہ اور با مقصد اور مبنی بر حقیقت نظام ہے ، اور جس کے متعلق یہ بھی بتایا جا چکا ہے کہ اس میں باطل ہمیشہ حقیقت سے ٹکرا کر پاش پاش ہو جاتا ہے ) اس کی حقیقت یہ ہے کہ اس پورے نظام کا خالق ، مالک ، حاکم اور رب صرف ایک خدا ہے ، اور اس حقیقت کے مقابلے میں باطل یہ ہے کہ اسے بہت سے خداؤں کی مشترک سلطنت سمجھا جائے ، یا یہ خیال کیا جائے کہ ایک بڑے خدا کی خدائی میں دوسرے چھوٹے چھوٹے خداؤں کا بھی کچھ دخل ہے ۔ سورة الْاَنْبِیَآء حاشیہ نمبر :19 یعنی وہی فرشتے جن کو مشرکین عرب خدا کی اولاد سجھ کر ، یا خدائی میں دخیل مان کر معبود بنائے ہوئے تھے ۔