اور اگر تم ان گھروں میں کسی کو نہ پاؤ تب بھی ان میں اس وقت تک داخل نہ ہو جب تک تمہیں اجازت نہ دے دی جائے ۔ ( ١٦ ) اور اگر تم سے کہا جائے کہ : واپس چلے جاؤ ۔ تو واپس چلے جاؤ ۔ یہی تمہارے لیے پاکیزہ ترین طریقہ ہے ، اور تم جو عمل بھی کرتے ہو اللہ کو اس کا پورا پورا علم ہے ۔

پھر اگر ان میں کسی کو نہ پاؤ ( ف۵۰ ) جب بھی بےما لکوں کی اجازت کے ان میں نہ جاؤ ( ف۵۱ ) اور اگر تم سے کہا جائے واپس جاؤ تو واپس ہو ( ف۵۲ ) یہ تمہارے لیے بہت ستھرا ہے ، اللہ تمہارے کاموں کو جانتا ہے ،

پھر اگر وہاں کسی کو نہ پاؤ تو داخل نہ ہو جب تک کہ تم کو اجازت نہ دے دی جائے ، 26 اور اگر تم سے کہا جائے کہ واپس چلے جاؤ تو واپس ہو جاؤ ، یہ تمہارے لیے زیادہ پاکیزہ طریقہ ہے ، 27 اور جو کچھ تم کرتے ہو اللہ اسے خوب جانتا ہے ۔

پھر اگر تم ان ( گھروں ) میں کسی شخص کو موجود نہ پاؤ تو تم ان کے اندر مت جایا کرو یہاں تک کہ تمہیں ( اس بات کی ) اجازت دی جائے اور اگر تم سے کہا جائے کہ واپس چلے جاؤ تو تم واپس پلٹ جایا کرو ، یہ تمہارے حق میں بڑی پاکیزہ بات ہے ، اور اللہ ان کاموں سے جو تم کرتے ہو خوب آگاہ ہے

سورة النُّوْر حاشیہ نمبر :26 یعنی کسی کے خالی گھر میں داخل ہو جانا جائز نہیں ہے ، الا یہ کہ صاحب خانہ نے آدمی کو خود اس بات کی اجازت دی ہو ۔ مثلاً اس نے آپ سے کہہ دیا ہو کہ اگر میں موجود نہ ہوں تو آپ میرے کمرے میں بیٹھ جائیے گا ، یا وہ کسی اور جگہ پر ہو اور آپ کی اطلاع ملنے پر وہ کہلا بھیجے کہ آپ تشریف رکھیے ، میں ابھی آتا ہوں ۔ ورنہ محض یہ بات کہ مکان میں کوئی نہیں ہے ، یا اندر سے کوئی نہیں بولتا ، کسی کے لیے یہ جائز نہیں کر دیتی کہ وہ بلا اجازت داخل ہو جائے ۔ سورة النُّوْر حاشیہ نمبر :27 یعنی اس پر برا نہ ماننا چاہیے ۔ ایک آدمی کو حق ہے کہ وہ کسی سے نہ ملنا چاہے تو انکار کر دے ، یا کوئی مشغولیت ملاقات میں مانع ہو تو معذرت کر دے ۔ اِرْجِعُوْا ( واپس ہو جاؤ ) کے حکم کا فقہاء نے یہ مطلب لیا ہے کہ اس صورت میں دروازے کے سامنے ڈٹ کر کھڑے ہو جانے کی اجازت نہیں ہے بلکہ آدمی کو وہاں سے ہٹ جانا چاہیے ۔ کسی شخص کو یہ حق نہیں ہے کہ دوسرے کو ملاقات پر مجبور کرے ، یا اس کے دروازے پر ٹھر کر اسے تنگ کرنے کی کوشش کرے ۔