سورة اٰلِ عِمْرٰن حاشیہ نمبر :31
مسیحیوں کی گمراہی کا تمام تر سبب یہ ہے کہ وہ مسیح کو بندہ اور رسول ماننے کے بجائے اللہ کا بیٹا اور الوہیت میں اس کا شریک قرار دیتے ہیں ۔ اگر ان کی یہ بنیادی غلطی رفع ہو جائے ، تو اسلام صحیح و خالص کی طرف ان کا پلٹنا بہت آسان ہو جائے ۔ اسی لیے اس خطبے کی تمہید یوں اٹھائی گئی ہے کہ آدم علیہ السلام اور نوح علیہ السلام اور آل ابراہیم علیہ السلام اور آل عمران کے سب پیغمبر انسان تھے ، ایک کی نسل سے دوسرا پیدا ہوتا چلا آیا ، ان میں سے کوئی بھی خدا نہ تھا ، ان کی خصوصیت بس یہ تھی کہ خدا نے اپنے دین کی تبلیغ اور دنیا کی اصلاح کے لیے ان کو منتخب فرمایا تھا ۔
