چند ہی سالوں میں ! سارا اختیار اللہ ہی کا ہے ، پہلے بھی اور بعد میں بھی ۔ اور اس دن ایمان والے اللہ کی دی ہوئی فتح سے خوش ہوں گے ، ( ٢ )

چند برس میں ( ف۵ ) حکم اللہ ہی کا ہے آگے اور پیچھے ( ف٦ ) اور اس دن ایمان والے خوش ہوں گے ،

اللہ ہی کا اختیار ہے پہلے بھی اور بعد میں بھی 2 ۔ اور وہ دن وہ ہوگا جبکہ اللہ کی بخشی ہوئی فتح پر مسلمان خوشیاں منائیں گے ۔ 3

چند ہی سال میں ( یعنی دس سال سے کم عرصہ میں ) ، اَمر تو اﷲ ہی کا ہے پہلے ( غلبۂ فارس میں ) بھی اور بعد ( کے غلبۂ روم میں ) بھی ، اور اس وقت اہلِ ایمان خوش ہوں گے

سورة الروم حاشیہ نمبر : 2 یعنی پہلے جب ایرانی غالب آئے تو اس بنا پر نہیں کہ معاذ اللہ خداوند عالم ان کے مقابلے میں شکست کھا گیا ، اور بعد میں جب رومی فتح یاب ہوں گے تو اس کے معنی یہ نہیں ہیں کہ اللہ تعالی کو اس کا کھویا ہوا ملک مل جائے گا ۔ فرمانروائی تو ہر حال میں اللہ ہی کی ہے ۔ پہلے جسے فتح نصیب ہوئی اسے بھی اللہ ہی نے فتح دی اور بعد میں جو فتح پائے گا وہ بھی اللہ ہی کے حکم سے پائے گا ۔ اس کی خدائی میں کوئی اپنے زور سے غلبہ حاصل نہیں کرسکتا ۔ جسے وہ اٹھاتا ہے وہی اٹھتا ہے اور جسے وہ گراتا ہے وہی گرتا ہے ۔ سورة الروم حاشیہ نمبر : 3 ابن عباس ، ابو سعید خدری ، سفیان ثوری ، سدی ( رضی اللہ عنہم ) وغیرہ حضرات کا بیان ہے کہ ایرانیوں پر رومیوں کی فتح اور جنگ بدر میں مشرکین پر مسلمانوں کی فتح کا زمانہ ایک ہی تھا ، اس لیے مسلمانوں کو دوہری خوشی حاصل ہوئی ۔ یہی بات ایران اور روم کی تاریخوں سے بھی ثابت ہے ۔ 624ء ہی وہ سال ہے جس میں جنگ بدر ہوئی اور یہی وہ سال ہے جس میں قیصر روم نے زرتشت کا مولد تباہ کیا اور ایران کے سب سے بڑے آتشکدے کو مسمار کردیا ۔