اور جو لوگ ایمان لے آئے ہیں اور انہوں نے نیک عمل کیے ہیں ، اور ہر اس بات کو دل سے مانا ہے جو محمد ( صلی اللہ علیہ وآلہ وسلم ) پر نازل کی گئی ہے ۔ اور وہی حق ہے جو ان کے پروردگار کی طرف سے آیا ہے ۔ اللہ نے ان کی برائیوں کو معاف کردیا ہے اور ان کی حالت سنوار دی ہے ۔

اور ایمان لائے اور اچھے کام کیے اور اس پر ایمان لائے جو محمد پر اتارا گیا ( ف٤ ) اور وہی ان کے رب کے پاس سے حق ہے اللہ نے ان کی برائیاں اتار دیں اور ان کی حالتیں سنوار دیں ( ف۵ )

اور جو لوگ ایمان لائے اور جنہوں نے نیک عمل کیے اور اس چیز کو مان لیا جو محمد صلی اللہ علیہ وسلم پر نازل4 ہوئی ہے ۔ اور ہے وہ سراسر حق ان کے رب کی طرف سے ۔ ۔ ۔ ۔ ۔ ۔ ۔ ۔ اللہ نے ان کی برائیاں ان سے دور کر دیں5 اور ان کا حال درست کر دیا6

اور جو لوگ ایمان لائے اور نیک عمل کرتے رہے اور اس ( کتاب ) پر ایمان لائے جو محمد ( صلی اللہ علیہ وآلہ وسلم ) پر نازل کی گئی ہے اور وہی ان کے رب کی جانب سے حق ہے اﷲ نے ان کے گناہ ان ( کے نامۂ اعمال ) سے مٹا دیئے اور ان کا حال سنوار دیا

سورة مُحَمَّد حاشیہ نمبر :4 4 ۔ اگرچہ اَلَّذِیْنَ اٰمَنُوْا کہنے کے بعد اٰمَنُوْا بِمَا نُزِّ لَ عَلیٰ مُحَمَّدٍ کہنے کی حاجت باقی نہیں رہتی ۔ کیونکہ ایمان لانے میں محمد صلی اللہ علیہ و سلم اور آپ صلی اللہ علیہ وسلم پر نازل ہونے والی تعلیمات پر ایمان لانا آپ سے آپ شامل ہے ، لیکن اس کا الگ ذکر خاص طور پر یہ جتانے کے لیے کیا گیا ہے کہ محمد صلی اللہ علیہ و سلم کے مبعوث ہو جانے کے بعد کسی شخص کا خدا اور آخرت اور پچھلے رسولوں اور پچھلی کتابوں کا ماننا بھی اس وقت تک نافع نہیں ہے جب تک کہ وہ آپ صلی اللہ علیہ وسلم کو اور آپ صلی اللہ علیہ وسلم کی لائی ہوئی تعلیمات کو نہ مان لے ۔ یہ تصریح اس لیے ضروری تھی ہجرت کے بعد اب مدینہ طیبہ میں ان لوگوں سے بھی سابقہ در پیش تھا جو ایمان کے دوسرے تمام لوازم کو تو مانتے تھے مگر محمد صلی اللہ علیہ و سلم کی رسالت کو ماننے سے انکار کر رہے تھے ۔ سورة مُحَمَّد حاشیہ نمبر :5 5 ۔ اس کے دو مطلب ہیں ۔ ایک یہ کہ جاہلیت کے زمانے میں جو گناہ ان سے سرزد ہوئے تھے ، اللہ تعالی نے وہ سب ان کے حساب سے ساقط کر دیے ۔ اب ان گناہوں پر کوئی باز پرس ان سے نہ ہو گی ۔ دوسرا مطلب یہ ہے کہ عقائد اور خیالات اور اخلاق اور اعمال کی جن خرابیوں میں وہ مبتلا تھے ، اللہ تعالی نے وہ ان سے دور کر دیں ۔ ان کے ذہن بدل گیے ۔ ان کے عقائد اور خیالات بدل گیے ۔ ان کی عادتیں اور خصلتیں بدل گئیں ۔ ان کی سیرتیں اور ان کے کردار بدل گئے ۔ اب ان کے اندر جاہلیت کی جگہ ایمان ہے اور بد کرداریوں کی جگہ عمل صالح ۔ سورة مُحَمَّد حاشیہ نمبر :6 اس کے بھی دو مطلب ہیں ۔ ایک یہ کہ پچھلی حالت کو بدل کر آئندہ کے لیے اللہ نے ان کو صحیح راستے پر ڈال دیا اور ان کی زندگیاں سنوار دیں ۔ اور دوسرا مطلب یہ کہ جس کمزوری و بے بسی اور مظلومی کی حالت میں وہ اب تک مبتلا تھے ، اللہ تعالی نے ان کو اس سے نکال دیا ہے ۔ اب اس نے ایسے حالات ان کے لیے پیدا کر دیے ہیں جن میں وہ ظلم سہنے کے بجائے ظالموں کا مقابلہ کریں گے ، محکوم ہو کر رہنے کے بجائے اپنی زندگی کا نظام خود آزادی کے ساتھ چلائیں گے ، اور مغلوب ہونے کے بجائے غالب ہو کر رہیں گے ۔