کہتے ہیں کہ : اگر ہم مدینہ کو لوٹ کر جائیں گے تو جو عزت والا ہے ، وہ وہاں سے ذلت والے کو نکال باہر کرے گا ، ( ٨ ) حالانکہ عزت تو اللہ ہی کو حاصل ہے اور اس کے رسول کو ، اور ایمان والوں کو ، لیکن منافق لوگ نہیں جانتے ۔

کہتے ہیں ہم مدینہ پھر کر گئے ( ف۱۸ ) تو ضرور جو بڑی عزت والا ہے وہ اس میں سے نکال دے گا اسے جو نہایت ذلت والا ہے ( ف۱۹ ) اور عزت تو اللہ اور اس کے رسول اور مسلمانوں ہی کے لیے ہے مگر منافقوں کو خبر نہیں ( ف۲۰ )

یہ کہتے ہیں کہ ہم مدینے واپس پہنچ جائیں تو جو عزت والا ہے وہ ذلیل کو وہاں سے نکال باہر کرے 15 گا ۔ حالانکہ عزت تو اللہ اور اس کے رسول اور مومنین کے لیئے 16 ہے ، مگر یہ منافق جانتے نہیں ہیں ۔ ع

وہ کہتے ہیں: اگر ( اب ) ہم مدینہ واپس ہوئے تو ( ہم ) عزّت والے لوگ وہاں سے ذلیل لوگوں ( یعنی مسلمانوں ) کو باہر نکال دیں گے ، حالانکہ عزّت تو صرف اللہ کے لئے اور اس کے رسول ( صلی اللہ علیہ وآلہ وسلم ) کے لئے اور مومنوں کے لئے ہے مگر منافقین ( اس حقیقت کو ) جانتے نہیں ہیں

سورة الْمُنٰفِقُوْن حاشیہ نمبر :15 حضرت زید بن ارقم کہتے ہیں کہ جب میں نے عبداللہ بن ابی کا یہ قول رسول اللہ صلی اللہ علیہ و سلم تک پہنچایا ، اور اس نے آ کر صاف انکار کر دیا اور اس پر قَسم کھا گیا ، تو انصار کے بڑے بوڑھوں نے اور خود میرے اپنے چچا نے مجھے بہت ملامت کی ، حتیٰ کہ مجھے یہ محسوس ہو ا کہ حضور صلی اللہ علیہ وسلم نے بھی مجھے جھوٹا اور عبداللہ بن ابی کو سچا سمجھا ہے ۔ اس چیز سے مجھے ایسا غم لاحق ہوا جو عمر بھر کبھی نہیں ہوا اور میں دل گرفتہ ہو کر اپنی جگہ بیٹھ گیا ۔ پھر جب یہ آیت نازل ہوئیں تو رسول اللہ صلی اللہ علیہ و سلم نے مجھے بلا کر ہنستے ہوئے میرا کان پکڑا اور فرمایا لڑکے کا کان سچا تھا ، اللہ نے اس کی خود تصدیق فرما دی ( ابن جریر ۔ ترمذی میں بھی اس سے ملتی جلتی روایت موجود ہے ) ۔ سورة الْمُنٰفِقُوْن حاشیہ نمبر :16 یعنی عزت اللہ کے لیے بالذات مخصوص ہے ، اور رسول کے لیے بر بنائے رسالت ، اور مومنین کے لیے بر بنائے ایمان ۔ رہے کفار و فُسّاق و منافقین ، تو حقیقی عزت میں سرے سے ان کا کوئی حصہ ہی نہیں ہے ۔